愛蓮．愛自在花園

　
　
整理一下早前在大西北工作的見聞。
　

之一
一月某日晚上，某承辦商發現臨時發電機側的電掣箱鎖頭被人剪斷，電掣箱內一共十八個水氣掣被竊，損失約港幣三千元。承辦商決定報警。承辦商發現只有發電機旁的掣箱有零件被竊，其餘掣箱則沒有任何被撬痕跡。於是我們推斷，竊賊明顯十分熟悉電業－－因為發電機沒有開動便代表他可以安全地拆走零件，而其餘電箱則接駁公園的電源，風險較高，便沒有偷。
　
我們將這推理告訴警方，警方只是說，很難查，這種事在這一區，天天都有。後來同事問我，警察有沒有為電掣箱掃指紋？我只能告訴他，我們看得電視劇太多了。
　

之二
接上則。我們每晚都有安排保安員通宵輪值，失竊事件發生後，便要求保安公司解釋及加強巡邏，並捉來之前一晚當通宵更的保安員查問，那保安員只是說：「小姐，我一個人邊睇得晒咁大個地方呀，冇呀冇呀我咩都見唔到聽唔到呀。」

而事後我發現，當你訓示所有保安員提高警覺的時候，他們都是口徑一致地回答你「小姐，我一個人邊睇得晒咁大個地方呀。」或者「o的人勸極都唔聽架我叫黎做乜者！仲要成日俾佢地鬧！」

然後我通常都回這一句：「咁點解我係咁意行過巡下都望到有人行左入去封左o既地方呢? 又點解我一叫佢又會行返出黎架呢？我都明有部份人係勸極唔聽仲鬧返轉頭，但咁亦唔代表你就可以唔做你責任範圍內應做o既事。況且，我同你都一樣，我都日日響度俾人鬧，但我都一樣係要做架，你明唔明？」
　
　
之三
某日早上，公園入口的數隻己接好電線的猴子燈籠，被發現被人夾硬拉出來，連電線都扯斷，而且被踐踏至燈泡全碎，鐵架盡斷，直徑八吋以上的猴子頭被踩至薄如紙皮。
　
　
之四
節目當晚，近五百人擅自扯斷封鎖用的紅白膠帶，爬上佈滿沙石的山坡看表演，險象環生。最經典一幕是一名中年男子扶著一名撐著拐杖的約八十歲老婦，走上那其實已站滿了人(俾你擒到上去都俾人遮到睇唔到啦)，又容易被沙石滑倒的山坡上。我勸止，當然不獲理會。
　
　
之五
成功進入 / 爬入 / 闖入觀眾席範圍的觀眾，每逢舞蹈員出場，均報以噓聲。但奇怪的是，既然認為不好看，又為甚麼一直賴著不走？

大概因為噓人，要人難堪，是很好玩的吧？
　
　
之六
陳ｘ德在台上獻唱期間，兩名觀眾不請自來衝上台大跳老舞(但係咁就冇人噓個喎)。幸德哥闖蕩多年咩場面未見過，執生說沒想過會有人免費伴舞。最攪鬼的是，兩名觀眾跳完舞，鞠躬同向觀眾揮手囉。
　
　
之七
話說，燈會安排了古裝藝人巡遊，人物有運財童子、財神、舉羅傘的侍從、福祿壽三星等等。

在黑壓壓的人潮中被折騰三個多小時後，由肥仔飾演的財神報告，與觀眾拍照時被人「逗pat」數次。而由白白淨女生飾演的運財童子，亦投訴多次被男人和女人，掃背。
　
　　
之八
熊貓綵燈小鹿綵燈造型十分別緻，但因為始終草地面佈滿電線，所以置了矮小的木圍欄，貼了告示。現場頻頻有小童衝進去想騎熊貓或騎鹿，同事勸止的時候，遭家長大罵：「你係唔比人入o既咁點解你地唔整o的高o既欄丫？整得個樣得意o的細路仔實攪架啦！你地自己唔圍好o的之嘛！我投訴你呀！」
　
　
之九
拆燈籠清場。我在草坡上查看哪一些燈籠可以保留。期間，一名阿伯路過，大叫：「DelayNoMoreChauHai，擺左咁lun多日都未見佢地著過！都唔知GauMugLunChuut...」
　
該名阿伯，每天早上都來下棋，我認得。大叔，你既然是早上來，當然不曾見過亮燈啦下話。
　
　
上述其實都只是冰山一角。你話係咪好開心好增廣見聞呢。
　
亦因為太多這種事密集地發生，那陣子，我造了幾次怪夢。有空另文再講。